O GI-ESCULCA da USC organiza o vindeiro 15 de xuño a Terceira Xornada de Encontro da Comunidade de Accións e Saberes Arredor do Rural (www.arredordorural.org). Un evento para o encontro entre colectivos rurais, estudantes e profesorado que teñen interese nas actividades de Aprendizaxe-Servizo vinculadas ao medio rural, como forma de integrar o impulso da acción rural e a aprendizaxe e proxectos de futuro no rural. Celebrarase no Centro de Estudos Avanzados da Universidade de Santiago de Compostela.
Neste terceiro encontro perséguense os seguintes obxectivos:
- A posta en común dos avances feitos no marco da comunidade.
- A difusión e promoción entre o estudantado dos proxectos da comunidade e da labor e os saberes dos colectivos que a conforman.
- A ampliación a outras formas para vincular coñecemento e acción rural no futuro da comunidade.
Este encontro ten carácter formativo sustentado nas aprendizaxes mutuas e multidireccionais entre diferentes tipos de axentes.
Fonte: GI ESCULCA
